Текст утвержден Священным Синодом
Русской Православной Церкви
22 октября 2015 года (журнал № 82)

Кондак 1

Изря́дное и ди́вное вспоможе́ние нам дарова́ся,/ о́браз Твой честны́й, Богоро́дице Де́во,/ я́ко изба́вльшеся явле́нием его́/ неду́гов душе́вных и теле́сных и ско́рбных обстоя́ний,/ благода́рныя хвалы́ прино́сим Ти, всеми́лостивая Засту́пнице./ Ты же, Госпоже́, приклони́ся благоутро́бно/ к на́шим воздыха́нием и во́плем серде́чным,/ и исцеле́ние пода́ждь стра́ждущим, да с ве́рою воззове́м Ти:// Ра́дуйся, Влады́чице, Неупива́емая Ча́ше, духо́вную жа́жду на́шу утоля́ющая.

Икос 1

А́нгельстии чи́ни и пра́ведников со́нми непреста́нно сла́вят Тя, Цари́цу Богоро́дицу, Хода́таицу о ро́де челове́честем, в беззако́ниих погруже́ннем и во гресе́х пребыва́ющем, да́руеши бо нам во утеше́ние и спасе́ние ми́лость Свою́ чрез чудотво́рныя ико́ны Твоя́, и́хже, я́ко зве́зды небе́сныя, по всей земли́ на́шей зрим. Ко еди́ному же от сих образо́в, Неупива́емая Ча́ша имену́емому, припа́дающе, из глубины́ се́рдца взыва́ем Ти:

Радуйся, непристу́пнаго Божества́ селе́ние;

радуйся, непреста́нное челове́ков удивле́ние.

Радуйся, скорбьми́ грехи́ на́ша очища́ющая;

радуйся, печа́льми на́ша не́мощи врачу́ющая.

Радуйся, ми́лость Свою́ нам свы́ше посыла́ющая;

радуйся, ско́рбная сердца́ на́ша веселя́щая.

Радуйся, пречу́дное всех с Бо́гом примире́ние;

радуйся, му́ки ве́чныя изве́стное избавле́ние.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 2

Ви́дящи, Пречи́стая Влады́чице, ско́рби серде́чныя, му́ки душе́вныя, покая́ние и́скреннее челове́ков, губи́тельным поро́ком пия́нства одержи́мых, благоволи́ла еси́ дарова́ти богоспаса́емому гра́ду Се́рпухову ми́лость Твою́ явле́нием пречу́днаго о́браза Твоего́, да вси, с ве́рою и сокруше́нным се́рдцем к нему́ припа́дающии и исцеле́ние от тя́жкаго неду́га своего́ обрета́ющии, усе́рдно вопию́т Бо́гу: Аллилу́ия.

Икос 2

Разуме́в трикра́тное явле́ние преподо́бнаго Варлаа́ма и повеле́ние от него́ во гра́д Се́рпухов ше́ствовати, челове́к не́кий, стра́стию пия́нства одержи́мый, обре́те та́мо в монастыре́ ико́ну Твою́ святу́ю, Неупива́емая Ча́ша имену́емую. Мы же, ви́дяще таково́е о нас, гре́шных, попече́ние, со благогове́нием воспева́ем Ти такова́я:

Радуйся, сла́ву чуде́с Твои́х гре́шным открыва́ющая;

радуйся, Путеводи́тельнице, пу́ть благи́й им явля́ющая.

Радуйся, ко спасе́нию нас привлека́ющая;

радуйся, благодаре́нию нас науча́ющая.

Радуйся, ско́рби на́шея в ра́дость претворе́ние;

радуйся, несумне́нною наде́ждою возвеселе́ние.

Радуйся, губи́тельныя стра́сти потребля́ющая;

радуйся, благи́м наме́рением посо́бствующая.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 3

Си́ла Вы́шняго благода́тию Влады́чицы укрепи́ не́коего челове́ка, неду́гом пия́нства стра́ждущаго, егда́ той, разсла́блене имы́й но́зе, потща́ся гра́да Се́рпухова дости́гнути, повеле́ние Богоро́дицы, чрез преподо́бнаго Варлаа́ма рече́нное, исполня́я. Обре́т же во гра́де сем ико́ну Пречи́стыя Богома́тере, а́бие исцеле́ от неду́га своего́, душе́внаго и теле́снаго, и с тре́петом воззва́ Бо́гу: Аллилу́ия.

Икос 3

Иму́ще исто́чник неоскудева́емый, неупива́емую ча́шу небе́сных дарова́ний, не то́кмо лю́дие гра́да Се́рпухова, но и вси правосла́внии христиа́не от ины́х градо́в и ве́сей, к Твоему́ пречу́дному о́бразу притека́юще и пред сим исцеле́ния обрета́юще, благода́рными усты́ вопию́т Ти си́це:

Радуйся, Е́юже ско́рби на́ша потребля́ются;

радуйся, Е́юже ра́дость спасе́ния излива́ется.

Радуйся, не́мощи душе́вныя и теле́сныя врачу́ющая;

радуйся, стра́сти моли́твами Твои́ми укроща́ющая.

Радуйся, коему́ждо прося́щему поле́зная да́рующая;

радуйся, безчи́сленныя щедро́ты всем подаю́щая.

Радуйся, ми́лости сокро́вище нам отверза́ющая;

радуйся, милосе́рдие к па́дшим явля́ющая.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 4

Бу́рю вну́трь иму́ще помышле́ний сумни́тельных, оба́че с покая́нием и́скренним к Твоему́ неизрече́нному милосе́рдию притека́юще, пия́нственною стра́стию одержи́мии исцеле́ние получа́ют, и от всея́ души́ зову́т рожде́нному от Тебе́ Спаси́телю на́шему: Аллилу́ия.

Икос 4

Слы́ша Госпо́дь тя́жкия ско́рби, во́пли и плач жен, ста́риц, дете́й, и́хже сро́дницы обурева́еми суть пия́нственною стра́стию или́ безу́мием наркоти́ческим одержи́ми, дарова́ им, Пренепоро́чная, Твою́ ико́ну, от нея́же вси прося́щии утеше́ние и ра́дость духо́вную обрета́ют, и вопию́т Ти со слеза́ми такова́я:

Радуйся, А́гнице, А́гнца ро́ждшая, грехи́ ми́ра взе́млющаго;

радуйся, Ча́ше, от Исто́чника безсме́ртия че́рплющая.

Радуйся, ма́терей ско́рбных укрепле́ние;

радуйся, ненаде́жных благо́е наде́яние.

Радуйся, притека́ющих к Тебе́ благода́тное охране́ние;

радуйся, скорбя́щих отра́до и утеше́ние.

Радуйся, волне́ние страсте́й в нас усмиря́ющая;

радуйся, ру́ку по́мощи тре́бующим простира́ющая.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 5

Боготе́чную звезду́, честну́ю ико́ну Твою́, показа́ла еси́ нам, Влады́чице ми́ра, ю́же зря́ще и с ве́рою серде́чною моля́щеся Тебе́, Богоро́дице, глаго́лем: пия́нством и ины́ми неду́ги душе́вными или́ теле́сными стра́ждущия исцели́, ве́рныя же научи́ воспева́ти хвалу́ Бо́гу: Аллилу́ия.

Икос 5

Ви́дяще чудеса́ пресла́вная и зна́мения пречу́дная, не то́кмо от ико́ны Твоея́, Богома́ти, во гра́де Се́рпухове явле́нныя, быва́емая, но и от я́же по подо́бию сея́ ико́ны изображе́ний, припа́дающе к ним, смире́нно глаго́лем Ти:

Радуйся, притека́ющих к Тебе́ ско́рая Предста́тельнице;

радуйся, моле́ний на́ших благосе́рдная Услы́шательнице.

Радуйся, гра́д Се́рпухов благослове́нием Твои́м осени́вшая;

радуйся, в преде́лех моско́вских сла́ву чуде́с Твои́х яви́вшая.

Радуйся, сокро́вище исцеле́ний неоскудева́емое;

радуйся, возде́ржником всемо́щная Покрови́тельнице.

Радуйся, проти́ву ми́ра и диа́вола подвиза́ющимся Споспе́шнице;

радуйся, в ми́ре благоче́стно живу́щих усе́рдная Засту́пнице.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 6

Пропове́дующе чудеса́ Твоя́, Богороди́тельнице, мо́лим Тя, Пречи́стая, со слеза́ми: изба́ви все́х нас от па́губнаго к винопи́тию пристра́стия и от паде́ний грехо́вных, подвиза́ющи воспева́ти Бо́гови: Аллилу́ия.

Икос 6

Возсия́ све́тлость Боже́ственныя сла́вы от ико́ны Твоея́, Де́во Богоотрокови́це, иде́же Госпо́дь на́ш Иису́с Христо́с я́ко Младе́нец зри́тся, о́браз Та́ин Свои́х Пречи́стых нам явля́яй, и от страсте́й ме́рзких с ве́рою притека́ющим избавле́ние да́рует. Мы же Тебе́, Пречи́стей Его́ Ма́тери, вы́ну о нас Сына Своего́ умоля́ющей, гла́сы немо́лчныя прино́сим сицевы́я:

Радуйся, я́ко о Тебе́ ра́дуется а́нгельский собо́р;

радуйся, я́ко о Тебе́ торжеству́ет челове́ческий род:

Радуйся, похвалы́ небе́сныя и земны́я сла́вою превосходя́щая;

радуйся, рожде́ннаго Тобо́ю А́гнца нам ди́вно показу́ющая.

Радуйся, ко врато́м жи́зни ве́чныя приводя́щая;

радуйся, от исто́чника нетле́ния жа́ждущия напая́ющая.

Радуйся, от паде́ний грехо́вных возставля́ющая;

радуйся, неиссяка́емою бла́гостию никого́же оставля́ющая.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 7

Хотя́ челове́к не́кий возблагодари́ти Тя, Влады́чице, исцеле́ния ра́ди от неду́га пия́нственнаго, украси́ Твою́, Богома́ти, пречу́дную ико́ну, во гра́де Се́рпухове пребыва́ющую, со благодаре́нием воспева́я Бо́гу: Аллилу́ия.

Икос 7

Ди́вная чудеса́ ви́дим, Пречи́стая, от ико́ны Твоея́ святы́я: стра́стию пия́нства стра́ждущии, к Твоему́ ма́тернему предста́тельству прибега́юще, от тя́жкаго неду́га своего́ избавля́ются, и хвалу́ Тебе́ принося́ще, зову́т такова́я:

Радуйся, живоно́сный Исто́чниче исцеле́ний;

радуйся, Купе́ле Небе́сная Боже́ственных дарова́ний.

Радуйся, реко́ исцеле́ний приснотеку́щая;

радуйся, мо́ре, стра́сти на́ша потопля́ющее.

Радуйся, во грехи́ впа́дшим наде́жду подаю́щая;

радуйся, ма́тернима рука́ма Твои́ма тех возставля́ющая.

Радуйся, сердца́ благочести́вых возвеселя́ющая;

радуйся, вся блага́я проше́ния на́ша исполня́ющая.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 8

Стра́нно и сумни́тельно неве́рующим слы́шати, ка́ко ико́на Твоя́ свята́я Боже́ственных исцеле́ний источа́ет струи́. Мы же, о́ной благогове́йно поклоня́ющеся, лобыза́ем ю, вопию́ще Бо́гу: Аллилу́ия.

Икос 8

Все упова́ние стра́ждущии неду́гом пия́нства на Тя, Де́во Чи́стая, возлага́ют: приклони́ся к не́мощем на́шим, уврачу́й стра́сти. Кто бо нас гре́шных изведе́т из ро́ва поги́бели, а́ще не Ты, Влады́чице? Сего́ ра́ди, коле́на пред Твои́м честны́м о́бразом прекло́ньше, воспева́ем Ти та́ко:

Радуйся, моле́ния гре́шников не отверга́ющая;

радуйся, призыва́ющим Тя небе́сную по́мощь ниспосыла́ющая.

Радуйся, глубину́ милосе́рдия Твоего́ гре́шным показу́ющая;

радуйся, отча́янных и безнаде́жных ободря́ющая.

Радуйся, одержи́мым стра́стию пия́нства поможе́ние;

радуйся, терпели́вых страда́льцев благода́тное утеше́ние.

Радуйся, неду́гов на́ших блага́я Цели́тельнице.

радуйся, от суеты́ мирски́я на́ша Охрани́тельнице.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 9

Вся́кое естество́ а́нгельское удиви́ся де́лу Твоего́ милосе́рдия, Го́споди, я́ко дарова́л еси́ гре́шному ро́ду челове́ческому тве́рдую Засту́пницу и Помо́щницу, к на́шим не́мощем приклоня́ющуюся и от го́рькаго неду́га пия́нства свобожда́ющую, ве́рныя же науча́ющую пе́ти Тебе́: Аллилу́ия.

Икос 9

Вети́и многовеща́ннии недоуме́ют восхвали́ти по достоя́нию ди́вное, Богома́ти, ико́ны Твоея́ явле́ние, ниже́ мы, гре́шнии, от скве́рных усте́н на́ших возмо́жем просла́вити Засту́пницу на́шу, я́коже подоба́ет. Оба́че, душе́ю и се́рдцем ра́дующеся, Тебе́ глаго́лем:

Радуйся, я́ко лик Твой свяще́нный явля́ет чудеса́;

радуйся, я́ко ско́рое еси́ посрамле́ние отверга́ющих Тя.

Радуйся, от бед и скорбе́й при́сное огражде́ние;

радуйся, прибега́ющих к Тебе́ от зла сохране́ние.

Радуйся, кро́тким сия́нием Твои́м мглу страсте́й разгоня́ющая;

радуйся, ду́ши на́ша любо́вию к Тебе́ и Сы́ну Твоему́ исполня́ющая.

Радуйся, ко стезя́м покая́ния прему́драя Наста́внице;

радуйся, до́браго нам отве́та пред Судие́ю Пра́ведным Хода́таице.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 10

Спасти́ хотя́щи мно́гия, чу́дную ико́ну Твою́, Присноде́во, пия́нством неду́гующим дарова́ла еси́, да вси одержи́мии се́ю стра́стию к чудотво́рному о́бразу Твоему́ притека́ют и, исцеле́ние получи́вше, во умиле́нии взыва́ют Бо́гу: Аллилу́ия.

Икос 10

Стена́ еси́ и щит, Богома́ти, пия́нства неду́гом стра́ждущим, и всем усе́рдно к Тебе́ притека́ющим и ико́ну Твою́ святу́ю благогове́йно чту́щим, сию́ бо нам дарова́ благи́х Пода́тель Госпо́дь в по́мощь и цельбу́ от губи́тельныя стра́сти, и тем наказу́ет нам пе́ти Тебе́ такова́я:

Радуйся, врачева́ний ло́жных гро́зное испроверже́ние;

радуйся, благода́ти Врача́ И́стиннаго к нам привлече́ние.

Радуйся, Твое́ю чистото́ю на́шу скве́рну очища́ющая;

радуйся, Твое́ю благода́тию на́ше недосто́инство просвеща́ющая.

Радуйся, естество́ на́ше тле́нное в нетле́ние облека́ющая;

радуйся, моле́ния на́ша Твои́м предста́тельством укрепля́ющая.

Радуйся, от неможе́ния на́шего нас восставля́ющая;

радуйся, объе́мший нас о́блак страсте́й разгоня́ющая.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 11

Пе́ние на́ше смире́нное, от любве́ и усе́рдия Тебе́ приноси́мое, не пре́зри, Чи́стая, и не отврати́ ли́ка Твоего́ от стра́ждущих неду́гом пия́нства и отча́явшихся, но помози́ им и нам очи́ститися от вся́кия скве́рны грехо́вныя, да возмо́жем досто́йно и пра́ведно пе́ти Бо́гу: Аллилу́ия.

Икос 11

Светоприе́мную свещу́ зрим Тя, Пресвята́я Де́во, Твой бо о́браз святы́й луча́ми благода́ти Твоея́ мглу грехо́вную прогоня́ет и на све́тлую стезю́ доброде́телей наставля́ет с ве́рою зову́щих Ти такова́я:

Радуйся, от суеты́ ми́ра сего́ многомяте́жнаго нас изыма́ющая;

радуйся, прираже́ния страсте́й плотски́х отража́ти нам помога́ющая.

Радуйся, мысль бла́гу в се́рдце на́ше полага́ющая;

радуйся, омраче́нную со́весть на́шу просвеща́ющая.

Радуйся, мучи́тельными неду́ги стра́ждущих избавля́ющая;

радуйся, ко и́скреннему покая́нию и исправле́нию призыва́ющая.

Радуйся, ду́ши всех озло́бленных укрепля́ющая;

радуйся, и́мя Твое́ сла́вящих спаса́ющая.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 12

Благода́ть Бо́жия, предста́тельством Твои́м, о Богома́ти, подава́ется всем скорбя́щим, обездо́ленным, вдова́м и ста́рицам, наипа́че же пия́нственным неду́гом стра́ждущим, и не тщи отхо́дят си́и, Пречи́стая, от неупива́емыя ча́ши Боже́ственных дарова́ний Твои́х, но неоску́дно цельбы́ получа́юще, Всеблага́я, благода́рственно вопию́т Бо́гу: Аллилу́ия.

Икос 12

Пою́ще Твоя́ чудеса́ и ве́лию ми́лость, стра́стию пия́нства одержи́мым явле́нную, мо́лим Тя, Влады́чице, спаси́ и поми́луй, и наста́ви на стезю́ пра́ву, и не оста́ви нас, покро́ва Твоего́ и́щущих и зову́щих Ти:

Радуйся, росу милости Твоея́ нам низводя́щая;

радуйся, от пристра́стия к хмельно́му питию́ свобожда́ющая.

Радуйся, от пия́нственныя стра́сти врачева́ние;

радуйся, в разслабле́нии су́щим кре́пкое поможе́ние.

Радуйся, го́рдыя смиря́ющая;

радуйся, смире́нныя возвыша́ющая.

Радуйся, малоду́шных ди́вное ободре́ние;

радуйся, благоду́шных ве́лия ра́досте.

Радуйся, Влады́чице, Неупива́емая Ча́ше, духо́вную жа́жду на́шу утоля́ющая.

Кондак 13
читается на коленях трижды

О Преми́лостивая Ма́ти Сладча́йшаго Го́спода на́шего Иису́са Христа́! Ны́нешнее на́ше услы́ши моле́ние и изба́ви нас от всех неду́гов душе́вных и теле́сных, наипа́че же исцели́ пия́нством стра́ждущия, да не во зле поги́бнут, но да спасе́ннии Тобо́ю при́сно вопию́т Бо́гу: Аллилу́ия.

Этот 13-ый кондак читается трижды. Затем читается ВНИМАНИЕ: снова 1 Икос, после 1 Кондак, после Молитва

Моли́тва

О, Премилосе́рдая Влады́чице! К Твоему́ заступле́нию ны́не прибега́ем, моле́ний на́ших не пре́зри, но ско́ро исцели́ тя́жким неду́гом пия́нства одержи́мых бра́тий и сестр на́ших и того́ ра́ди от ма́тере своея́, Це́ркве Христо́вы, и от спасе́ния отпада́ющих. О Всеми́лостивая Ма́ти Бо́жия, косни́ся серде́ц их и ско́ро возста́ви от паде́ний грехо́вных, исцели́ я и ко спаси́тельному воздержа́нию приведи́. Умоли́ Сы́на Своего́, Христа́ Бо́га на́шего, да прости́т нам согреше́ния на́ша и не отврати́т ми́лости Своея́ от люде́й Свои́х, но да укрепи́т их в трезве́нии и целому́дрии. Приими́, Пресвята́я Богоро́дице, моли́твы роди́телей, о ча́дех свои́х сле́зы пролива́ющих; жен, о муже́х свои́х рыда́ющих; чад, си́рых и убо́гих, заблу́ждшими оста́вленных, и всех нас, к ико́не Твое́й припа́дающих, – и да прии́дет сей вопль наш моли́твами Твои́ми ко Престо́лу Всевы́шняго. Покры́й и соблюди́ нас от лука́ваго ловле́ния и все́х ко́зней вра́жиих, в стра́шный же час исхо́да на́шего помози́ проити́ непреткнове́нно возду́шная мыта́рства и моли́твами Твои́ми изба́ви ве́чнаго осужде́ния, да покры́ет нас ми́лость Бо́жия во ве́ки веко́в. Ами́нь.